Oté

Kansa va fé l’ané klimatik ? Pa sète ané an touléka ! Néna kékshoz pouri dann koloni !

Justin / 28 out 2019

JPEG - 43.6 ko

Na poin lontan marmaye lékol la fé son rantré é ziska zordi dan lé ba, la tanpératir lé korèk-pars dan lé o sé in n’ot zafèr konm zot i koné. Bann paran épi bann zanfan, bann mètr bann métrèss lékol, lo bann pèrsonèl i s’anplègn pa ankor, mé konbienn tan sa i sava diré ? Si lé konm tou lé zan, d’isi finn moi d’oktob-komansman moi d’novanm - va komans shofé . Si lé konm tou lézan, la tanpératir va adousi solman kan v’ariv moi d’ avril. Ankor, sète ané, moi d’avril té i fé sho, moi d’mé téi fé sho, moi d’juin té i fé ankor sho-mi parl pou bann zékol dan lé ba.

Alor i tard pa nou va antann demoun apré réklam la klimatizasyon lékol, pars pou in pé vantilatèr i ranvoye l’èr sho é l’èr sho, sa i ède pa bann marmaye épi bann amontrèr bien travayé. Si mi di azot in n’afèr : mi rapèl sète ané mèm, souvan dé foi kan moin té i sava shèrch pti marmaye lékol, moin téi oi in port rouvèr, épi konm k’i diré in madam asiz dsi in shèz dovan la port. Moin té a d’mandé kisa téi lé. Ziska ké in mové lang la di amoin sa sé la mètrèss pars èl i siport pa bien la shalèr. Romark bien, mi konpran aèl, mé mi kon pran galman bann marmaye, épi lé zot pèrsonèl, pars mi oi pa koman i pé travaye plin po avèk in fé sho konmsa.

Mète la klim dann bann klass ? Kèl klime pou komansé ? In klime solèr : akoz pa. In klimatizasyon par lo d’mèr, akoz pa. Mé la klime par sharbon épi gazoile la pa in bon n’afèr ditou.. Lé posib ankor abate la tanpératir avèk bann kouvèrtir do boi, sansa kon troplaké, sansa ankor bann pano fé avèk kann. Tousala lé posib, mé i fo in volonté politik sansa va arkomans grogné, kriyé san k’va ansèrv kékshoz.

Tout fason sa i vé pa dir i fo pa in nouvo roganizasyon l’ané éskolèr. Dopi lontan néna bonpé d’moun i réklam sa mé ziska zordi zéro kalbass. Kansa va fé in ka ? Kan va fé karant – sinkant dégré dan la klass é marmaye va tonm rède atèr é bann zamontrèr va fé fonksyone la plansh konjé maladi. I di partou, i fo mète lo zanfan dann sant lo dispozitif éskolèr : oké ! Mé kosa i atann ? Kan lapin nora korn. Sansa va ral La Rényon kosté sanm La frans konm i di dann shanté bato fou.
Na kékshoz lé pou ri dann la koloni : zot i pans pa ?