Zordi i tonm lo disèt mars. Lo tan difisl i komans pou bann moun mizèr la Rényon. Antansion, mi anparl pa zéléksyon zordi, mi anparl la vi kotidyène in bonpé d’moun. Pou trap trant-é-in mars lo tan sar long vèy pa koman.Koman i fé po ranpli lo vant gran moun épi sèt bann marmay ? Koman trouv manzé pou mète dann marmite ? Sirtou kan la fine pèy loiyé, lo, kouran épi tout bann dépans nana pou fé dan lo moi ? Koman fé bon figuir èk la famiy ? Koman fé kroir ou i mank de rien, kan ou i mank dé tou ?

Moin la lir in zour dsi lo site rényoné di mond, in moun téi di konmsa,demoun i konète pi la fain dan nout péi : shario bondé i roul dovan la kès sipèrmarshé, marshandiz déor, boutèy la boisson é tout la suit. Kosa mi pé dir dsa ? Lé vré na in bonpé d’moun nana sak i fo an sifizans ! Lé vré galman nana in bonpé d’moun na poin sak i fo an kantité sifizant ! Lé vré osi la sosyété konsomasion i invant tout manyèr pou fouy trou dann out posh ! Solman lé pa bien obli la réalité out péi. Lé pa pars ou lé loin ké tout i vien roz toudinkou. I fo dir kan ou i ékout demoun dann radio sansa dann konvèrsasion privé, ou an apèrsoi désèrtin i oi pa pli loin lo bout zot né... Sa i fé pans amoin in n’afèr : in zistoir moin la lir kan moin lété pti.

Zistoir-la i rakont, in gro madam dann son dilizans i sava la mès minui dan la Frans. La fré i tap vèy p koman ; el i di son aménèr d’ voitir, kan v’artourn son mézon, èl va anvoy in sharèt sharbon pou bann pov shof azot. Mé kan èl i artourn son mézon bien shofé, èl i di avèk lo shofèr : "Pa bézoin amène in sharèt sharbon pou bann pov, pars i fé l’inprésyon la tanpératir la réshof in pé !".. ;. Kosa sa i vé dir ? Inn lé fasil pou obli in mové z’afèr. Dé : suivan out pozision ou i ziz lé shoz. Shakinn i oi l’èr ki lé avèk son montr ; in rish i pans toulmoun lé konm li ! in klass moiyèné i pans toulmoun lé konm li ! Bann moun o flan i oi zot ka é zot i pans lé pli préférab fé kékshoz pou zot plito k’angrèss sak lé déza gra.

Kansréti o moins, aplik la shart lermitaj. Sré déza i bon pa an avan !

Justin