Alor, banna la ranvoy sis jènn fiy z’ot kaz akoz zot téi port in voil, mèm si i parétré zot la tir ali pou lèss solman in pti bandana. Bann résponsab la pran so désizion, d’apré sak zot i di, pou fé réspèkt la loi déssi la "laïcité".
Mi koné pa bien koman lé shoz la éspassé, mi koné pa sirtou si la bien aplik la loi konm lavé di k’noré fé lané 2005, kan la vote so loi-la... Mi koné pa, mé moin la antann dann déssèrtin radio, in pé la pa mank lokazion dévèrs z’ot bil kont sak lé pa égzaktéman konm zot vik dann kèr zot nana la kapasité pou aïr.
Moin lavé antandi dir, la-ba dan la Frans, i éspas dé shoz konmsa, tazantan, mé moin lavé zamé mazine sérièzman, in n’afèr konmsa noré ariv issi, dan nout péi, nora ariv anou... mé l’arivé. Alors, kan sa i ariv, ou lé blizé rann aou kont par ou mèm, lo moun la pran lo désizion té pa paré konm k’i fo, pou pran lo bon désizion k’i fo prann.
Mi domann solman, dann monkèr, si zot té kapab konprann La Rénion, son kiltir, son manièr viv an parmi, lé z’inn avèk lé z’ot, si zot té kapab mézir lo danzé pou le demin bann rénioné... Akoz la loi, dann in ka konmsa, i roganiz pa in komité dé saj, kansréti pou donn in bon konsèy.

Justin