Mézami, yèr nou la anparl lo shari-vari lé posib i ariv dann moiyin-oryan, rant L’amérik épi l’Iran pou komansé épizapré rant in group péi in koté, épi in group péi in n’ot koté. Zo i koné l’amérik-la li na pou abitid mète inn-dé péi par koté épi li apèl sa bann gran Satan. Momandoné zot l’avé klass dann katégori-la l’Iran déza dann tan, La koré di nord, épi d’ot ankor.

Klass in pé péi dann ran bann gran Satan, sa néna pou avantaz fé kroir ou lé dann kan Bon dyé, mé néna arienk ou k’i kroi sa, lo mond an zénéral i kroi pa ditou out anboulkidi. Pou in pé sé ou lo Satan é pou d’ot zot i fé pa in kont avèk sa sof si zot sékirité lé an zé... Dopi trump l’ariv prézidan l’amérik li la pa arète sèye fé kroir l’opinyon intèrnasyonal la sékirité l’amérik té a danzé alé oir toulmoun i koné bien sa sé inn krak.

Pou sa li ménas a droite, a gosh, partou. Dabor li pans la koré di nor i mète la sékirité l’amérik épi son bann zalyé an danzé. Pou l’Iran, li ménas son bann voizin é par l’okazyon bann zalyé l’amérik. Ziska lo Kuba révolisyonèr sé in danzé. Sa i pèrmète l’amérik boykote lo bann péi – la dann zot komèrs internasyonal, épi si li pé ruine zot lékonomi. Désèrtin, é dann ta bann zoinalis i fé konmsi zot i kroi in blag konmsa épi tout lo bann mouton i rogard la télé zot osi zot i rant dann trin.

Tousa in marsh in pé d’tan mé in momandoné kosa i fé ? I atak, I atak pa. Si atak pa lomoun sé d’fout dsa gèl. Si I atak, l’èrla sé lo mond antyé lé dann in sityasion difisil. Dann touléka sé konm k’i diré désèrtin I rant dann shou, épi i parpiy la malady partou ziska k’i trouv pi ditou in bon romède pou règ lo problèm.