Lindi, l’avé in manifèstasyon l’AJFER dovan la préféktir. Demoun té i manifès pou lo droi bann Rényoné travay dan zot péi. Sa té i tonm zis pandan la grèv bann dokèr pou sèy anpèsh lisansyé dis nèf pèrsone i travay dan lantrotien bann sharyo-kavalyé, so bann gran bébèt métalik i oi dann por. Soi-dizan pars zot lé pa kapab fé travay-la, sinonsa pars na d’ot pèrsone i sort déor i gingn myé travay ké zot. L’èr-la, na in késtyon i fo ni poz anou : akoz bann Rényoné, solon bann paton, lé pa kapab fé travay-la, alé oir in pé partou dan bann gran por, i poz pa in problèm konm sa ? Akoz, solon bann patron, i fo tir d’moun déor pou fé travay-la ?

I pé an avoir o moin dé répons : inn, bann sosyété la pa fé lo nésésèr pou anvoy zot travayèr an formasyon, konm sa, in zour, i konstat zot lé pa an éta pou fé so travay-la. Biensir, si ou i form pa ou normalman, in zour ou lé pi an éta fé in n’afèr... Dézyèm répons, sa in manyèr débaras bann patron avèk in pèrsonèl sindiké, é lé zot lé, konm i di, tayab épi korvéab ziska lo trognon. Aprésa, firamézir, an misouk, lé posib rokrit d’ot pèrsone lé pa solidèr rant zot... Pou sa, i komans di lantropriz lé dann difikilté, mé ziska zordi, li amontr pa son kont, pars lé asé fasil fé pas larzan kont an kont — mi di pa i fé sa ! —, mé mi di k’i pé, épi roganiz lo difikilté ékonomik. Bann travayèr na lo moiyin nonm in léspèr pou vérifyé lo kont : sé sak va fé, donk nou va bien oir si lé mantèr sansa si lé vré. Mé la zéstyon, épi la prodiktivité, sof mon réspé, sé bann patron k’i doi avèy sa, soign sa, suiv sa do pré konm lé dsi l’fé. Sa, sé lo patron ké lé résponsab. Donk si li fé mal son travay, la pa lo travayèr ki doi zèt sanksyoné. Oi zot mèm kisa i doi zèt !

In pti poin dsi listoir nout péi : zot i koné, pandan lontan, bann dokèr lo por la Rivyèr dé Galé té lo méyèr dokèr l’avé dan bann por loséan Indien. Donk si zot lété kapab avan, na poinn rézon pou k’zot lé pi kapab zordi, mèm si bann téknik la shanjé, mèm si nana mashine bien modèrn, é pou lantrotien bann mashine ,sé lo mèm zafèr. Kapab yèr, kapab zordi, kapab domin pou dévlop nout péi.

 Justin