Bann Madagascar i sort ankor gingn déga siklone : inn lavé poin assé, té i falé dé. Alors, la krazé é pliské krazé, la tié dmoun, la ral déyèr landroi zot té fine fé dé pti pa an avan. Shak ané, banna i gingn lo shok : si la pa dann sid, sé dann nor... si la pa dann nor sé dann milié, sansa plizièr landroi an mèm tan.

Alors, kossa i fé : konm dabitid i kri sokour, ziska la proshène foi. Koman pa kri a l’èd kant out péi lé dévasté, kan ou i oi la fain l’apré fatig out popilassion. Ou i kri, mé out fièrté nasional, kossa ou i fé, ou i mète dann out posh épi out moushoir par dsi. Lèr-la ou i antann tout sort kalité dmoun donn a ou tout sort kalité konsèy. Mé kèl kalité konsèy, mon dié ségnèr ? Bat la lang dann vid, in poin sé tou...

Plis ou lé pov, oplis siklone i fatig aou, oplis la kaz lé fay, oplis èl i kass, tanpir napoin la dig, tanpir dolo i débord...Alors, i fo ékip lo péi, mé kan ou napoin lo pourkoi. Nana lontan, i parl ko-dévlopman, mé i parl, san k’i fé vréman. Ni pé pa kontant dir : « karapat i mont arienk si tété bèf mèg ! » Akoz sa ossi sé fé bat la lang pou arien.

Justin