Mézami mi koné pa si zot i rapèl ankor lo tan bèf l’avé karapate é tan-la demoune téi i amenn bèf dan la mèr pou grène lo karapate. Aprésa bèf lété an form é zot té i ropran in pé favèr… Sof bèf mèg pars dsi li, i paré karapate té i tienbo lontan a suss son san.

Astèr konm sa sé in provèrb alon sèye in kou konprande kossa sa i vé dir. Pou mwin sa i vé dir opliss ou lé dann malpassé, opliss lé sète plé d’légypte i tonb dsu ou. Mizèr wi pèrd larzan. Malad ou néna ankor pli movèz santé. Faye, wi afayi ankor. La pa bézoin fé in déssin pou zot konprande.

Alé ! mi kite azot rofléshi la dsu é ni artrouv pli d’van. Sipétadyé.

Justin