Oté

Karapate i pous dsi tété bèf mèg mé bèf gra la pa égzanté pou son par

Justin / 25 zwiyé 2018

JPEG - 43.6 ko

Matant Zélida la ékrir Justin :
Mon shèr nové, mon spès salté, rouj-de-fon dopi l’étèrnité, alor si mi konpran bien bann parti lo lopozisyon lo prézidan Macron lé résponsab si in moun dann son lékip la pète in kab. Moin pèrsonèl mi pans plito lo boug sé in l’anvoiyé. Lanvoiyé pou fé dézord dann park kanar é pou annuir nout prézidan. Akoz zot lé jalou d’li konmsa ? Li lé jenn, li lé bo, li néna in bon pongn, é sirman li plé bann madam. Alor ? Kosa néna a rodir ? Z’ot zalouzri néna pou rodir ! Tok ! Pran sa pou toi !

Justin la fé pou répons :
Mon vyé matant ki koz toultan la boush rouvèr i pé pa dir ou i rogard dann out long-vi bon koté, mèm sanm pou moin ou i gard sa par lo pti bout la lorgnète. Kan i anparl aou lo réspé la légalité, ou i parl zalouzi. Kan i di aou lo bann sèrvis lo prézidan té oblijé dépoz plint, ou i di lo ga té fine gingn son pinisyon (kinz zour pinisyon)
Mé dizon la pa la lo problèm i lé. Ousa li lé alor ? Matant lé sinp : i sifi ou i baz aou dsi lo kozman : i fo inn koz pou la mor. In n’ot ankor : si karapate i mont dsi tété bèf mèg, i ariv bèf gra la pa égzanté. Donk avèye bien sak i sava arivé, ou va oir out prézidan la pankor vi lo komansman di komansman di komansman. Tok ! Pran sa pou ou !