Médame, zé Méssyé, la sosyété koze èk mwin sé koze èk in kouyon, mé sé o pyé d’lo mir k’i oi lo masson. Mézami mi panss zot i koné kozman-la, parss noute paran la répète anou sa dé mil é dé san foi kan nou lété pti sinploman pou ankouraz anou a sorte dann tan difisil pou trape in méyèr pèryode, in pèryode pli gayar pou nou. Mé si ni kalkil bien, nou bande kroiyan, la pa pars noute bande zansète la fé lo péshé originèl ké la anvoye anou dsi la tèr pou fé pénitanss ? Antansyon, mwin pèrsonèl, mi trouv la vi sé in gayar z’afère, é la pa in pinission ditou mé ni koné nou néna konm in lépé damoklèss lé dsi noute tète é lo bo tan i pé vir o mové. Zot i rapèl kan nou téi sava katéshiz lo père téi parl anou sète vash gra, épi sète vash mèg toussa pou di 7 bone ané va duiv sète mové l’ané. Sa té sinploman pou dir anou la rou i tourn souvan dé foi, kissoi pou alé dann bon, sansa pou alé dann lo pa bon. Alor si sé sa la vi alon pran ali konm li lé é pa konm noi yèmré li lé. An atandan, mi kite azot rofléshi la dsi é ni artrouvpli d’van. Sipétadyé.