Antouléka néna in n’afèr mi panss bande zanssien néna dann zot mémoir é sète-la sé karné la boutik : in sinp karné ou téi mark sak wi sava rodé la boutik é lo shinoi – lo komèrssan si zot i vé – i marke lo pri an fass. Momandoné i fé lo konte é lo kliyan i pèye kan li la fine ramass in bon moné.

Sa i pé zète lo ka bande plantère kann, téi pèye zot krédi kan lizine la fine pèye zot kann, kissoi lo promyé avanss, lo dézyème, lalkol, la mélasse, sansa lo ronm. Sa té krédi san lintéré é lo komèrssan téi fé konfyanss é la plipar d’tan – sof inn-dé ka zot i pé dire amwin – sa lété réspékté. Antouléka lété konmsa ké mwin té i oi lé shoze kan pti marmaye mwin téi sava f é komission avèk karné mon famille.

Astèr alon majine in pé : kan nou lété dé san mil rényoné, l’avé pétète plizyèr dizène mil karné an sirkilassion é sa té larzan-sa. Konbien million Cfa ? Mi koné pa mé ni pé dire sistème krédi-la la ède in bonpé famiye pou zoinn lé dé boute par l’milyé é lo laktèr prinsipal ladan I fo pa ni obliye in n’afèr konmsa-lété la kominoté bande shinoi.

Justin

NB

Sistème-la lété frazil é lo kommèrssan l’avé intéré bien suiv son kliyantèl. In zistoir : mwin l’avé par-la dis-douzan kan nout komèrssan lé mor é son kor lété éspozé dann l’aryèr boutik. Zanfan lo komerssan lété ankor jenn é son madame l’avé tro traka pou majine landomin. Mon papa, in yab madré mi kroi, la koze avèk lo promyé garsson é la di ali : profite la véyé pou fé sign lo karné par bande kliyan – sa i vo sak sa i vo, mé sé in garanti… Lo promyé garsson la fé sign shakinn son karné – in pti vèr d’rome a la klé – é aprésa lé shoze la plito bien éspassé.