Bonpé d’moun, sé tan isi, i koz dann radyo. Bann zournalis, la plim nana ziska la dyaré akoz bann z’évènman. L’aparèy foto i may son bann flash, èk tout sort kalité z’éklèr i klat dan la nuit. Dann télé, i fé sobatkoz. I diskit dsi la vi shèr, dsi la mizèr d’moun, dsi lo mank travay. Demoun i dsann dann shomin pou réklam kont la vi shèr.

La vi lé shèr pou vréman. Bann marshandiz lé shèr, sirtou kan i sava ashèt sa dan l’Erop, i fé balad sa in pé dan tout z’oséan, dan la mèr konm dan lé z’èr, épi i mèt ankor in bon marj bénéfisyèr dsi. Ya bon banania ! Systèm kolonyal lé ankor bien la. Près, konm ki diré, lo sistèm Colbert : in koloni, sa i produi pa, sa lé la arienk pou ashèt bann marshandiz la métropol. In koloni, sa i produi pa ? Donk ni parl dévlopman nou la ! Dévlopman ? In n’afèr bann gouvèrnman la Frans la fé tout sak i falé pou anpéshé. Sa i fé ké nou lé pa dévlopé konm k’i fo ziska zordi.

Poitan, bonpé d’moun i di, nou nana z’atou dan nout jé. Nou lé pa kondané viv ni dan la mizèr, ni dan l’asistans. Alor, kosa k’i klosh pa ? Sarko li mèm la di, ni pé fé isi sak Maurice i fé. Alor, ésplik amoin in pé pou kosa z’éta zénéro l’Outre-mèr la fini an lo d’boudin konmsa ? Na in program dévlopman la-dan, akoz i aplik pa ? Nout parti la fé la syène… akoz i tienbo pa kont ? Sré pli préférab ké dir anou : "Ravaz pa, marmay !", konm port-parol gouvèrnman i sort di. Rès trankil ? Lé bien bon, mé pou kosa i ral anou an aryèr konmsa ? Gouvèrnman i doi réspèk son parol plito ké di sak li di épi anvoy anou in bann kas-an-fèr. I sar pa bazar èk sa !

 Justin