Mi pans, konm moin zot la vi sa ? Vi k’la pass dsi Rényon la promyèr. Kosa i lé sa ? In rout solèr, pa plis ni moins… Zot va dir amoin in pé partou l’apré mont bann prozé konmsa. Alor, an koué sète afèr-la i intérèss anou ? Pou koué in pla konmsa avèk in ké d’moru ?
An koué sa i konsèrn anou ?

Sinploman ké la rout-la i sava fé sa dann l’il Rodrigues.arzout èk sa ké sé in rout solèr épi ké lo bann zésé lété fé isi La Rényon par bann z’antropriz Colas. Zot la pa antann parl de sa, ni moin, mé lé konmsa é pa otroman. Isi i zoué, laba i fé !
Mé zami, apré lo trin ésprèss dann lil Maurice, ala la rout solèr dann l’il Rodrigues. Sak i avans pa i rokil, é sanm pou moin dann sète afèr-la, ni rokil alé oir dann tan Paul Vergès lété prézidan la Réjyon, sé nou téi ansèrv modèl pou ansèrv bann zénèrzi ronouvlab.
Alon azout ankor in grin si zot i vé : zot i rapèl la cinor kan èl téi vé ansèrv lo diféransyèl tanpératir lo d’mèr rant lo fon épi la sirfas pou klimatiz bann batiman piblik. Zot i rapèl tout dézord-tapaz la fé la dsi, ébin figir azot la fni par rononsé-la sinploman parti fé sa ayèr.
San obliye lo tram-train Didier Rober t la antèr sa, san rézon, sof ké té Paul Vergès l’avé lans prozé-la. Lé vré la promète anou in rout an mèr, in rout pou trap Sin-dni avèk La Possession pou dé milyar mèm si zordi i rosanm l’afèr lé in pé an pane mé dé milyar sa i trouv pa sou la pate shoval mé i paré k’i trouv ankor bann milyar konmsa. A ntansyon la doulourèz ! Mé sa lé kon pri dan la pyès.

Alor, Mésyé, Médam, La sosyété, sépa kosa zot i anpans mé antouléka sé i bon loson pou konplèks sipèryorité désèrtin néna. Mi pans sa i rann pa nou fyèr. An kontrèr mi pans in pé sré bien avizé d’kashyète zot tète dsou la zèl ladvèrsèr konm in kok batu i fé la plipar d’tan. Dann in ka konmsa la pa lokazyon pou gonf lo zabo !