Mi sort sign in pétisyon pou domann madam Bardot zéskiz ofisyèl par raport èl la jir lo pèp rényoné. Par la mèm okazyon moin la romark plis dé mil pèrsone l’avé déza sign pétisyon-la é moin lé sir néna ankor plizyèr milyé pou signé. Pars d’apré sak madam-la la di, sa i mérite in bon protéstasyon.
Zot i pé dir : « Justin la mète lo tan avan désid sign lo pétisyon ! ». Mé mi pé dir azot souvan dé foi mi suiv bann kozman rényoné é néna inn i di konmsa : « I diskite pa avèk in kouyon, i donn ali rézon ! ». I pé dir galman ou i pé pa angaj in diskisyon sèryé avèk in moun sirtou si li l’apré di bann bétiz pli gro ké son tète.

Astèr, pou kosa mi di i fo sign pétisyon-la ? Sinploman pars BB sé in moun la ote, èl lé koni dann lo mond antyé é lé posib désèrtin moun lé riskab suiv aèl akoz son sélébrité… Ni pé di galman, la pa toultan èl i di bann bétiz konmsa : pou bann bébé fok, mi doi dir moin la pans konm èl. Dann d’ot ka galman mé dann son dèrnyé sorti èl la di déshoz lé pa akséptab pou in péi konm la n’ote, épi pou son pèp.

I étoneré pa moin dann désèrtin shomyèr, néna in pé apré répète lo bann mèm zafèr : « Bann rényoné lé konmsa don ? Z’ot vyé fonn barbari i révèye konmsa tazantan don ? Z’ot ADN sré marké konmsa don ? ». I fo rokonète sak i koz konmsa dsi nou, i koné pa nou pou vréman. Pars fransh vérité si nou lé pa parfé, si nou néna nout kalité épi nout défo, lé pa po sa bann rasist i pé di ninport de koi dsi nou.
Par l’fète, moin la antann dir madam Bardot, tribinal la fine kondane aèl o moins sink foi pou son bann kozman rasist é moin lé prétaparyé sa i sa spassé pou son lète dsi bann rényoné. Ankor in kou èl lé riskan ète kondané ankor.