Oté

Katastrof natirèl sansa katastrof demoun ?

Justin / 26 avril 2018

JPEG - 43.6 ko

Néna dé foi I anparl katastrof natirèl : kisoi siklone, kisoi tourbiyon, kisoi ankor l’inondasyon donk shak foi la natir i manifèst ali in fason brital, danzéré, é shak foi néna déga pou la vi sansa pou lo bien demoun néna dsi la tèr. i mank pa anparl katastrof natirèl.
Solman oila, i ariv ké lo katastrof natirèl la pa si natirèl ké sa é ké bien souvan défoi l’om, momandoné, li lé résponsab sak i ariv é ké li batiz katastrof natirèl.
Isi La Rényon, sanm pou moin, nou lé for la dsi. Ni maltète la natir é kan in katastrof i ariv, ni konsidèr la pa nout fote-nou lé pou arien la dan é sa i déboush biensir dsi in « moin lé pa la èk sa » . Si an plis ni pé vèrs inn–dé larm kan in dram i ariv, ni pé z’ète kontan pou sak ni pans ète nout bon kèr.

Konbien foi nou la fé la romark sé par nou k’i ariv gro-gro dézagréman ! Konbien foi bann pouvoir piblik i pran pa z’ot réponsabilité. Kisa, dann bann résponsab la parti komann zétid pou oir si lé pa danzéré artir dann bitasyon bann z’andains pou fé la rout dan la mèr. Zamé ! akoz sa ? Bin i di sa i apartien bann propriyétèr é li fé sak li vé avèk son tèr.
Sof ké ou i pé fé sak ou i vé, si sa i prézant pa in danzé é kisa i pé dir amoin na poin danzé si ou i artir bann z’andain. Kisa i pé dir amoin si in zour par in tsounami la rout an mèr i dégrène pa dann la mèr ? Avèk pétète in bann konsékans nignor pou l’instan.

Isi, i fé la kaz n’inport ou. Défoi mé pa touzour i gingn pèrmi pou konstruir mé kisa i koné si lo kontruksyon i prézant pa in danzé pou l’moun va abite dann kaz-la … Kan i ariv in koulé d’bou, va parl anou katasrof natirèl.
Katastrof natirèl ? Son do lé bien larj é kèl sé pa par bann spékilatèr la-dan, bann kapitalis, étout kalité profitèr tout kalité z’akabi... Si mi di azot kapitalis lé siirman pou kékshoz la-dan, zot va pans moin l’apré farsé. Poitan non ! Mi vé pa farsé pars sanm pou moin i ariv bien souvan ké pou in gro paké larzan demoun i atoriz azot fé n’inport de koi. Ni vé ! Ni vé pa ! Mé lé konmsa.