Kan mwin lété marmaye mi rapèl lo katrèr té l’èr pou ravaz. Ravaz kossa i lé ? lété sirtou manyok, patate, fig sansa friyapin… La kaz nou l’avé la shanss an avoir toussala pars papa té agrikiltèr, momon téi fé lékol é la boutik shinoi lété pa tro loin é nou l’avé in karné laba. Konm bonpé d’moune !

Antouléka, katrèr téi falé kal in kou la fain pou anpèsh ali fatig anou é pou sa nou téi pran in pti konblaz. Mé défoi konblaz téi sorte diréktoman dann manzé koshon pars koshon téi partaz avèk nou — ké li vé ké li téi vé pa !- bann rassine téi kui dann son manzé.

Zordi ankor mi rèv in n’afèr… In fète rassine pou rapèl anou lo gou lontan. An souvnir noute pti konblaz nou téi pran dan, la zénèss. Mi kite azot mazine in pé sa é ni retrouv pli dvan, sipétadyé.

Justin