Zéléksyon réjyonal té i sort fini. In moun i téléfone in radyo pintade, pou dir li lé mizisyin é li lé kont lo tram-train pars kréol la bézoin travay... Domaz, li la pa parti pli loin k’sa, domaz li la pa rouv in pé plis son kèr, di in pé plis konm di lo kont lo fonn son mazinasyon.
Pars si li di tram-train i done pa travay kréol, li la tor : i donn kan i fé lo shantyé, kat mil pèrsone, dépi lo komansman ziska la finisyon l’ané 2020 par-la, i done kan lo train i roul. Arzoute èk sa li pèrmète demoun alé rode travay in pé partou, é rant zot kaz san fatig.
Donk, ziska zordi mi domann kèl kalité travay li rode : si li sé in bon mizisyin, mi doute pa ké li va gingn débrouy son kari dann son métyé… nora manazèr pou okip dé li, nora féstival pou li alé zoué, issi mèm épi déor. Si li sé in mizisyin la mok, i vo myé li shanj diréksyon, na poinn métyé an kouyon, na aryink demoun an kouyon.
Si li kroi bann koléktivité va pèy ali pou zoué ? Si li zoué byin, va anploye ali in pé rant-rant, mé la pa la-dsi li pé baz pou an avoir in vi konfor. Konm di bann zartis an Frans, nana la vash anrajé pou manzé avan ou i réissi. Kaye roti i sort pa dann syèl tousèl pou tonm dann oute bèk !

Justin