Matante Zélida la ékrir Justin :
Mon shèr nové, mon spès salté,
Mi koné pa si ou la byin ékoute mon pti prézidan Sarkozy. Pars si ou la ékoute ali, ou la di antann bann moun étranj koman i sava gouté. Sirtou sak la pa byin sivilizé, sak la min lé tro long épi sak i shaboul bann fors dé l’ord avèk grénade péi, sansa kou d’fizi. Toute demoun in pé onète lé dakor èk sa, sof pétète bann rouj-de-fon ; Touléka, mon pti prézidan va fé marsh azot droite, k’i vé, k’i vé pa, é tanpir pou l’moun konm zot. Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr,
Vi rapèl kank lo Sarkozy la di li sava nétoiye bann rakay kout karschèr ? Dir èk fèr, lé pa parèy. Dir sé boush lo zyé d’moun solman, pou ramass z’ot biltinn votaz. Ou i konpran pa, l’apré tourn in film konm sa mèm, pou tash moiyin gign son zéléksyon lané 2012.
Tir in moun son nasyonalité, apré li sar apatride, konm i di, l’èr-la, i fo protèz ali… lé obligatoir. Siprime l’alokasyon pou bann zanfan i frékante pa l’ékol ? Apré sa… va donn sokour bann paran l’apré viv dan la mizèr noir ? Kondane in paran in pène prizon pars zanfan délinkan i suiv pa son kontrol par la polis ? Sa i pass ar pa zamé, pars lé kont la Konstitisyon. Touléka, si li kontinyé dann shomin torte, li nana kèk kou d’zargo pou gingn avèk konsèy konstitisyonèl. Fransh vérité !

Justin