Alor win la mète a kalkillé é mwin l’avé poin tro pou fé mouline mon sèrvo pou réktifié mon kozman é sé la ké mwin la panss dann tan lésklavaz blan téi manj dori — pars la plantassion d’blé la pa tèlman bien marshé an débitan é zésklav téi manz maniok. Sa lété vré ossi dann tan Zangajé : zangazis téi manz dori, zangajé téi manj mayi épi kassav manyok.

Mi pé di galman apré lo tan zangajé, in pé d’moune sak la posh té plin la kontinyé manz dori, é sak la posh l’avé trou la manz mayi, la manj ravaz, la manz dori kan l’avé in moné — mwin la mèm konète sak téi manj dori mélanjé avèk mayi fitintan. Koméla ossi si zot i vé, késtyonn fé in pé dantèl.

Astèr si ni kalkil in kou noute baz lalimantassion koméla é dopi in bon koupe de tan sé dori kissoi lo ri Madégaskar, sansa lo ri Ségon, astèr sé lo ri blanshi in pé toute kalité néna dann komèrs.

Astèr si ni kalkil kossa ni doi manzé konm ri pou pran soin noute ptite santé i fo ni réponde dori konplé pars i paré sa sé lo méyèr nouritir d’baz pou nou mé la plipar rantre nou i manz pa sa pars nou lé pa abityé avèk sa.

Kan mwin lété pti é ké l’avé dori rouz pou manzé, fransh vérité, mwin téi yèm pa sa : konm toulmoune mwin téi yèm dori blan pars mwin téi koné pa sa lété dori blanshi. Poitan lo ri konplé, mwin lé sir sé lo méyèr ri pou nou lo bande z’imin mé oila la plipar rante nou i manz pa sa.

Poitan pou ète lo méyèr, sé lo méyèr é anpliss ké sa mi panss li dovré z’ète mwin shèr pars li sé lo moinss manipilé… Mi rapèl in zour méssyé lo Prézidan la chanb l’agrikiltir la di : si plantèr i vé plante dori, zot i pé planté, mé pou vande konm ri konplé pars sa lé plu shèr é néna assé pou gonf lo pla bande plantèr.

Mézami, mi arète tèr-la, mé mi panss i fo rouv in sobatkoz pou oir si ni vé manz lo méyèr, é kossa i lé méyèr pou nou. Mon granmèr Berthe téi di èl i vé manz kékshoz lé bon pou la boush, lé bou pou lo porte moné, lé bon pou la santé.

Mi diré la mèm shoz ké mon granmèr, mé i rèst a prouvé lo ri konplé i réponde lo troi kritère.

A bon antandèr, salu.

Justin