Dann kozman bann tizanyé wi antann souvan défoi lo mèm kozman é kozman-la i di : issi dann loutre-mèr tropikal néna bann plante i sèrv pou nouri lo klor, mé k’i sèrv galman pou amélyor la santé d’moune.

Mwin pèrsonèlman ké zot i pass dann radio, dann télé, dann zoinal, ké zot i koz dsi la plass marshé forin mi adore ékoute azot pars si pèrsonèlman mwin lé ignoran ladan, mi apréssyé lé shoz sèryèz rakonté sèryèzman.Na dë zour dann télé mi rogarde é mi oi in madam avèk son mari i plante gran-gran karo gro margoz apré dir margoz sé in bon nouritir mé sé ossi in bon médikaman. Lé vré li lé amèr é dayèr i di pa margoz lé amèr, lo grin lé dou, la rassine lé plate. Mé sak lo madam i di sé k’son lantropriz i pèrde pa arien dann son plantassion margoz é prinsipalman pou ède songn lo dyabète.

Mézami mi sorte lir in kékshoz intéréssan dann mon téléfone é oila kossa mwin la lir : lo frui, lo fèye, lo grin lé komèstib épi lé amèr sof lo pti pate rouj i antour lo grin lé dou. Kossa margoz i ède soigné ?Dabor lo diabète épi déssèrttin kanssèr, i ède lo kor siporte lo sik, é i diminyé lo mové kolèstérol.Dann japon laba i di si wi vé viv lontan wala in manzé pou manzé.Astèr pou lo nom i pé apèl ali momordica charantia,- lo nom syantifik- margoz, konkonm amèr, maroka , melon amèr sansa d’ote nom ankor. Ladan i trouv in prinsip aktif mé mi arète tèrla, épi mi invite bann marmaye é mèm bann zadilt pou alé dann lé zékri kossa i ansèrv in plante konmsa avèk toute son konpozission : lo frui , lo liane, lo grin la pate rouj i antour lo grin.

A bien konète in plante konmsa dann toute son konpozission,mi assir azot zot na pwin arien pou pèrde ladan.A bon antandèr salu !

Justin