Sé-pa kèl zour mi antan dann télé in nonm politik i di konm sa, li konpran pa poukoué bann zèn i sar manifésté kont la lwa èl-konmri. Li prétan di konm sa, in fwa lo gouvérman la désid prézant la lwa é konm nou la vot pou lo bann boug i roprézant lo gouvérman, ni dwa fèrm nout také é li arzout èk sa “Sé konmsa la démokrasy“ é pou li tou sak i rofiz la lwa soré in bann défalké, in bann aryéré, miéksa, in bann san konprann.

Alorss konm sa zordi néna sak i vivré an modérnité, sak lé dakor èk la lwa é dot pli vié zé, sak i rofiz touzour tout, konm li di, pou ral lo frin a min touzour ousinonsa pou pass kal bérnik, sad la lé konsidéré konm tang dann trou vik i vé pa avanss dovan. Lé vré nou la vot pou banna, mé mi ansouvyin pa dann tan si lo prézidan lavé mèt dann son program, li té i sar kass a so pwin lo kod di travay.

Lo boug la kozé an o, i di, li konpran pa osi zafèr i klik d’si intérnèt pou dénons la lwa. Pou li sa osi lé pa démokratik dapré son dir. Zordi néna pliské 1 million dé san d’moun la klik d’si lo sit, pou di, ni vé pa la lwa. Di kou bann moun défalké la trouv in mwayin modèrn pou fé antann a zot. Pou mwin kisa lé pa modèrn, sinon sak i vé ral a nou in sièk déryèr ? Mi koné pa kèl fougad la pass par la tèt banna pou prézant a nou in nafèr konm sa !