Mi sort lir dann zournal, la réjyon la rouv in baz Maurice. An prinsip, na poin arien pou roproshé la dan : Maurice, sé nout voizine, mèm i apèl ali l’Il Sèr, donk na poin arien pou krétiké la-dan, si ni raprosh avèk nout sèr ; donk, konmsa lé bon ! Konmsa ni konpran la vi ! sof ké lo lésplikasyon sanm pou moin, la pa bon ditou. Akoz ?

Pars lo roprézantan la Réjyon i di, nana par-la trann-sink l’antropronèr la fé l’invéstisman shé nout voizine é fèr in baz laba, sé pou ankouraj d’ot pou fèr parèy. Sé la k’i gaz pa ! Ousa i lé nout l’intéré dann sèt afèr ? Ousa i lé sak i apèl lo gagnan-gagnan. Zot i koné lo zistoir bannzil ! vaniy ? Mèm si i anparl pi tro, kréol i koné sa. Ousa lété lo gagnan-gagnan ? Lé zot lété gagnan mé nou, nou lété gagnan d’ koué ? Sa la pa amenn anou in touris an plis ! Pir ké sa, kan tourism lé zot la ardémaré, la n’ot la kontinyé kalé. La kour bann kont réjyonal la bien di sa lété larzan zété !!!

Zordi, avèk nout baz dann l’il Maurice, kosa ni sava gagné ? Ni sava gagné ké bann soutirèr bann transfèr larzan dopi La Frans ziska isi, apré avoir fé z’ot bèr dsi nout tèt, va alé plas zot larzan Maurice. Donk si nout voizine sar gagnan, nou sar pèrdan in foi anplis. Pou kosa ? Pars nout dévlopman lé dsi kès é nou na poin arien pou amenn bann l’antropronèr morisien isi.
Ala lo gagnan-gagnan mésyé Didié ! Inn fasonn fé roul anou in foi anplis dan la farine avèk nout larzan ! In nouvo kou dé bkk.

* BKK : bati, koki, kontan.