Kokoriko ! Lo kok fransé i shant. Akoz li shant ? Akoz son bann dalon la fé mirak. Kèl mirak mé z’ami ? Té i doi mèt déor 12.000 klandéstin la-ba Mayotte lané 2006, la mèt plis 13.000. For, tro for ! Si in pé kwasa-kwasa la koulé, in pé dmoun la pèrd la vi, i fo ajout ankor avèk lo shif lané 2006. Konbien ? Sa nou koné pa.

Bien sir, nana demoun lé klandéstin, mé kisa ki pé désid sa ? Demoun Mayotte ? Moin mi pans lé danzéré, in n’afèr konmsa, kisa alor ? Lo kolonializatèr, sak li-mèm, li lé an klandéstin la-ba, mi pans la pa posib, non pli.

Fé travay la tèt ! Sé gouvèrnman fransé la sépar Mayotte avèk bannzil Comores. : zisk’en 1995, l’ONU la d’mann k’i dékolonializ Mayotte, l’OUA la dmann sa ossi. Alor pars gouvèrnman fransé la fé in kouyonad lané 1975, i fo li arfé d’ot.

Lé ga ! la poin in méyèr zafèr pou fé la-ba ? Plito ké koz sï la koopérasion, pétèt i vo myé fé. I fo dédomaz banna pou tout lot la fé azot Sansa, bann moun lé jété konm sa, kosa zot va fé ? Pétèt arvir azot sï Al-Quéida ? Alor, kèl gran traka pou tout bannzil loséan indien.

Justin