Lané 1811, la pète in gran révolt la-ba Sin-lé : bann zésklav lavé désid tié tout bann mètr pou zot an avoir, pou zot mèm, in péi lib. Zot lavé mate zot plan bien konm k’i fo. Zot téi vé anprofite bann propriétèr tan-la té dann malizé, épi bann zanglé té i okip la koloni.

Solman, inn rant zot téi apèl Figaro la vann la mèsh èk bann mètr, épi bann zanglé la ède bann zésklavazist : lo plan bann zésklav la kass par bout, zot la pa gingn la viktoir, épi la réprésion la tonm déssi zot. Lo trète, li, pou son par, banna la bien rékonpans ali : Li la gingn in gran bout la tèr, dann sirk Silaos, dann in kartié i apèl Lilète-a-kord.

Dann l’afèr Miss Frans, a s’ki paré, nana in ra (in ra dë pat, mi mazine !) : li mèm la vann lo bann foto lo magazine “Entrevue”, épi li la gingn in bon moné. Pa si tan tèlman, a vré dir, pou in trahizon.

Alor, akoz pa donn nouvo Figaro-la in karo la tèr dann in lilète pandiyé kèk par ? Dizon, li pé gard larzan la trahizon, mé i fo pa li toush nout tèr, i fo pa li toush nout bout galé mèm dann in lilète pandiyé. Astèr, son min lé sal.

Justin