Mi koné in bon dalon navé la viann pou fé kui. Joli bout la shèr volay tann, nouri o grin, dan son tradision rénioné. Lù la done zépiss, l’anmèn de ri, le grin. Soman-là, si tout demoun i yèm son kizine, pèrsone la niabou done in marmit. Obou-du-kont, pèrsone la gout son kari, é té vréman domaj.

Va dir mi koz an parabol zordi. Aléwar, lé vré mèm. Mi koné in bon dalon nana in takon zidé pou ékrir d-liv. Joli fason ékrir, ki mèt an valèr son tradision rénioné. Lù la done son gouté, tout son gayar, son zarlor. Lù lé in bon zartiss zékrivin, tout demoun i di. Soman, na poin zéditèr pou tout demoun i gout, i lir son bann romans. Obou-dù-kont, pèrson la lir son liv, parss na poin pèrsone i vé édité. Dizon, pèrsone i pé piblié.

Jordù, nana le shoi rant in bon marmit an font, ousansa in kanyar kokot fransé. Mé bann zéditèr vanzèr na pù moyen fé sort bann liv kréol, kisoi romanss, ousansa fonnkèr, parss na pù larjan. Rèst le kokot fransé. Mé kisa i mèt do fé dosou ? É pou kèl kalité manzé le kèr ?

Zistin