Oté

Kèl koté i lé bann z’afro-arzantin ? Akoz près tout la disparète ?

Justin / 3 zwiyé 2018

JPEG - 43.6 ko

Konm moin, mi pans zot i gard bann latino zoué fotbal. Zot la fine oir Brésil, Pérou, Colombie. Zot la fine oir l’Arzantine dann la koup di mond i éspas koméla dann la Rissi. Mi pans konm moin zot la pans l’Arzantine in péi d’moun blan é mi pans zot néna rézon. Moun noir na poin sansa na pi : si na poin la zamé égzisté. Si na pi la égzisté mé la disparète. Zénosid ou koi ?

Pars dann tan bann zéspagnol té ki okip lo péi i apèl zordi l’Arzantine lété inn an parmi bann péi téi rosoi lo plis noir l’afrik dann son por Buenos-airès. Donk té i dovré an avoir in bonpé moun noir la-ba. Mé oila, néna tré pé. I paré l’ané 2013 la fé in rosansman é la trouv arienk 143000 noir dann l’Arzantine dsi in popilasyon plizyèr milyon d’moun… rant 4 épi 8pou san.

Normalman demoun l’Arzantine té i doi z’ète a popré konm de moun Brésil poitan la pa lo ka, é lé mèm loinn ète lo ka... Moin la trouv inndé lésplikasyon i vo sak zot i vo mé mi di kant mèm :
- dabor inn, gouvèrnman téi fé rant dann son l’armé plis noir ké néna an proporsyon sirtou dan la guèr kont lo Päraguay é i paré guèr-la la vi in bonpé solda mor dann bann konba.
- dézyèm rézon, bann noir téi abite dann bann kartyé l’avé poin l’ijyène, é mèm l’avé poin bonpé manzé, donk lo to d’mortalité lété pliské for par raport bann kartyé éropéin. Sirtou kan l’avé in l’épidémi fyèv jone.
- in troizyèm rézon l’ané 1853 in dékré la roganiz péploman l’Arzantine par bann zéropéin si tèlman demoun blan la vni an kantité, pars dann tan-la demoun téi kite l’érop pou alé dann l’émigrasyon.
- in n’ot rézon ankor, bann bononm noir la mor an kantité dann la guèr, dann bann travaye forsé, é bann fam noir la fé, d’apré sak i paré, zanfan avèk bann blan donk bann z’anfan klèr.
Arzout ankor in plan zénosidèr in prézidan l’Arzantine la fé pou tyé bann noir, konm la fé pou éimine bann z’indien La Patagonie dann sid lo péi.

Alor, si konm moin, zot i yèmré konète sak la spassé la-ba zot i pé alé rode dann l’internet é mi pans zot va trouv de koi fé singn z’ot kèr, konm moin la trouv do koi fé singn la myène. Mi pans pa sa va konsole azot pou an avoir vi Messi, pétète lo pli gran zouar fotball néna dsi la tèr zordi pèrd kont La Frans... Mi pans pa. Mi pans sirtou, konm moin, zot va oir la list demoun zénosidé alonz dovan z’ot zyé, alonz san fin.
Provèrb l’afrik : bèf i tyé pa bèf. Lé vré pou bèf mé la pa vré pou d’moun sa lé sir.