Na in proverb i di :  « di a moin ki sa ti frékante, ma dir a toué ki ti lé ! »

Toulmoun fine pass dérièr in kamarad é domann a li : «  ko sa toué laprè lir ? »

Lé in pé intime, ou pé giny po répons :  « pokoué, i rogard a toué ko sa moin la pré lir ? »  ; lagrésivité… lo boug lé pa dan son bon zour !

La répons i pé èt… le liv i parl tel péi, tel épok, sé in liv istorik, ou bien in roman (zafèr invanté) ; na ankor i razout a ou,  « bazé su dé fé réèl !! Tout resanblans ek do moun la egzisté lé pir koinsidans, tousala… »

Lot zour, dobout dovan in bibliotèk, mi domann in liv si Che Guevara, zot i koné lo révolusyonèr kubin, la parti fé bouz do moun in pé partou an Amérik di sid, dan lé zané 1956, 60, 70… Trouv pa. Bolivie ? Non. Argentine, non pli.

Brésil, moin la lir la pa lotan Jorge Amado…

Bon, mi wa Edouard Glissant "Tout Monde", alon mi prann sa ; Martiniké ; lu ékri an fransé ; son non lé dann diksyonèr(fransè) ; lu ékri su lesklavaz, lo kréol, lo métisaz kiltir ek lang. Pli d 500 paz ! Na plizir manièr aksèd la konésans ; koméla ou na la télé, lordinatèr é internèt, ou na lo sawar bann zansiin koté ou (kiltir oral), mé bayoun, po sak i koné lir, ou na la léktir !

Ou na poin riink liv an fransé (anglé, dot lang), ou na osi an kréol.

So week-end (mo anglé), moin lavé ant mé min "Tangor", liv André Payet, di Dédé Lansor ékri antièrman an kréol ; fondkèr( poèmes an fransé) ; zordi, nou nana bonpé zékrivin réyoné ; na pa lontan moin la lir in roman Bernadette Thomas, moin la giny an kado…

Kel liv mi sar soizi po lir ?

Justin