Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité,

somenn dèrnyèr, moin la antann in konvèrsasyon, mi dout pa va fé sort aou dann out gon. Kosa i lé o jis ? Alala ! Figuir aou, moin la antann inn-dé moun, an parmi in jenn fiy i sava lékol lisé. Zot té apré di, zot i koz kréol - biensir vi k’zot lé éné isi - mé zot i gingn pa lir... parl pi ékrir ! Donk moin té apré di dann mon kèr, kèl pèrdmann tan pou bann rouj-de-fon : dopi dé z’ané é dé z’ané zot lé apré sèy fé pass nout patoi kréol konm in lang ki koz, ki lir, ki ékrir é ala lo rézilta. Mèm bann marmay lékol lisé i ariv pa débarbote azot avèk sa. Sa i vé dir koi ? Sa i vé dir, sanm pou moin, kan ou la tor dann in n’afèr la vi i donn pa ou rézon é zot na tor dsi la késtyonn lo kréol. in poin sé tou ! Pran sa pou ou !

Note bien : Moin pèrsonèl , mi gingn lir, mi gingn ékrir mé la pa pou sa mi vé sé in règloman pou toulmoun. Sé sa lo défo !

Justin la fé pou répons :

Mon vyé matant k’i koz touzour la boush rouvèr,

Vi voi, konm in pé i di, la vi sé in pèrpétyèl répétisyon. Na plis sinkantan l’avé d’moun téi di kozman konmsa é moin pèrsonèl, moin té i pans lo tan ki pass nora tinn la ras demoun i koz konmsa. Poitan i diré lé pa vré san-pour-san mé sa i vé dir nou na tor ? Mi pans pa, pars la lang kréol rényonèz la fine bien avansé. Mi koné pa si ou i rapèl sondaz la Réjyon épi L’ofis la lang la komandé, na poin si tèlmann tan. Lo rézilta : la mazorité rényoné i aprésyé zot lang kréol, i èm koz so lang-la, i lir in tèks si i fo, é oplis ni avans dan lo tan, ni apèrsoi plizanplis demoun i lir nout lang, i ékri osi. Oplis ni avans dan lo tan oplis nout kréol i trouv son plas dann plizyèr komine, dann la piblisité, dann téat, dann bann shanté. Rouv in radio : demoun i koz kréol èk fransé, rouvèr zournal néna touzour inn-dé kozman an kréol... Mi pans lo tan l’arivé pou fé lo bilan sèryèzman, konm ki fo, syantifikman mé pou moin nout kréol la avansé. N’arienk sak i oi pa klèr, sak i antan pa zorèy é sak i ékout pa lé zot, pou alé d’isi d’laba pou rakont z’afèr pou di dé shoz konm ou la di an-o la. Kozé, lir, ékrir an kréol la pa lo uityèm travay Hercule, kant mèm la di.T ok ! Pran sa pou ou !

Mark sa bien koman sa s’fé ké ou i ékri amoin an kréol ? Sréti pa ké ou i ékri an fransé épi ou i domann mésyé googèl pou traduir an kréol. Sa arienk pou farsé, sa matant !

Justin