Pé s’fèr pou in pé in parti kan li néna résponsabilité dann sistèm tèl ké li lé, li doi bien jéré é kontante ali d’sa. Donk li répèke lo bande tèks la déssantralizassion épi li trass in politik lo pli progrssiss possib… Lé vré ké dopi 1959 la réjyonalizassion la pass par-la, la gosh avèk la droite la pratike l’altèrnanss, é néna déssèrtin séktère i marsh kom i fo. Arzoute èk sa léspérimantassion i pé pèrmète in politik linovassion.

I pé di sa, mé i fo pa obliye bande kozman nou la fine antande bonpé d’moune apré dire : in pé i di pa i fo shanj lozissyèl, pou d’ote konm pou l’INSEE nou lé vréman éspéssyal. Pli pré d’la réalité alon pa obliye lo nonb voiyan irouze dissi-d’laba apré alimé… Mi sorte lire in pti liv i porte dsi lo 19 mars é la komémorassion so zour-la. Son sizé prinssipal : aboli la mizère avan 2030 - « abolir la pauvreté avant 2030 » - Alor si la mizère i égziss, é si i fo aboli ali, ala pa in lakssyon révolissyonère, pou in prize an konte par in parti révolissyonère.

Astère si mi rapèl lo 25 propozission noute parti ébin mi di oila in program révolissyonèr : i sifi pa ké sa lé marké dann in liv, i fo ankor néna in lite pyé-a-pyé pou fé valoir bande solissyon. Même si défoi lopinyon piblike la fine tonb dakor avèk sa, la politike ofisyèl lé loin, pou prande an konte noute bande zidé. Poitan noute zidé lé bone é sé bande zidé-la lé bon pou noute pèp rényoné.

Si par ébzanpe ni pran lotosifizanss alimantère épi lotonomi énèrzétik mi panss lopinyon piblik lé dakor avèk sa, mé l’éta néo-kolonyal li pouss pa dann sanss la é si li done linpréssyon li lé dakor avèk sa, fransh vérité li rèss dakor avèk la politik kontoir… Alor in politik révolissyonère pou komanssé, sanb pou mwin, li doi kass lékonomi d’kontoir épi mète an plass in politik komèrssyal dézanklavé par rapor la politik kontoir. Mi panss sa i doizète in fèrd’lanss la politik révolissyonère pou in parti révolissyonère.

Justin