Mayi, sa in bon manzé pou vréman. Mayi-dé ri, sa pou gro-manzé, mayi-soso sa pou marmay, pou gramoun épi pou d’moun malad, le son, i fé gato avèk, la zèl i donn zanimo... Fransh vérité, sa in bon manzé ! Romark azot bien : sak mi di po mayi, lé vré pou de ri, lé vré pou maniok... Finn kont, lé vré pou tout bann nouritir, demoun la trouvé pou nouri z’ot kor, dann ninport é kèl l’androi, déssi la tèr.
Solman koméla, la trouv moiyin fé léssans avèk, pou mète dann mashine - i apèl sa "biocarburant" - Sa i fé avèk ninport é kèl plant sa, mé la désid fé sa avèk bann bon plantasion... Sak i ansèrv pou nouri demoun déssi la tèr : avèk lo blé, dé ri, mayi, luil épi konm lékonomi mondial lé pouri par larzan, lo pri la nouritir la goumanté. Alors bann pov - nana in bon pé konmsa, i kont an miliar - i mor in pé plis la faim.
In pé i di : sa bann biokarbiran la fote ! Sa zot mèm lotèr ! Si té pa zot nora pa ariv sa ! Lèss azot, zot i sava kass lizine, konm dann tan-lontan bann z’ouvrié téi démonte bann mashine. Pandan s’tan-la, kissa k’i ri dann z’ot barb, an misouk, an misoukant, épi i kont z’ot bénéfis ? Bann éspékilatèr, bann sosiété i fé kaloubadia (1) , vik i di pa k’sé z’ot l’apré fé mor demoun de faim. Zot lé kontan !
Alors kèl sé le gob (2) pou vréman ? Lo biokarbiran sansa la pouritir lékonomi mondial ? Alé, ni artrouv.

(1) kaloubadia : sé marché noir dann tan la guèr
(2) in gob : sé pièj « pou pèz zoizo dsou »

 Justin