Matant Zélida la ékrir Justin :
Mon shèr nové mon spès salté, rouj-de-fon dovan l’étèrnité, mi pans zot i doi z’ète kontan pars lo katastrof anonsé lé posib solon désèrtin k’i ariv. Mé antansyon anonsé, anonsé dakor, mé bar shomin lo katastrof pou moin sé in n’ot afèr. Fransh vérité si bann zanonsèr movèz nouvèl l’avé plito okip zot tan pou trouv solisyon pétète nou n’arté pa randu ousa nou lé randu. Tout fason mi kroi pa in fin di mond anonsé par l’om. Pou moin néna arienk bondyé lé kapab anons in n’afèr konmsa é fé an sort k’i ariv. Tok ! Pran sa pou ou !

Justin la fé pou répons :
Mon vyé matant k’i koz arienk la boush rouvèr, dann out kozman néna a boir é a manzé : in koté ou i mète an gard pangar lo fin di moind v’arivé, in n’ot koté ou i di plito k’anonnsé si l’avé rode solisyon nou n’ar pa été la, é aprésa so kou isi ou i mète tout dan la min Bondyé.
Alor, siouplé, arète in kou : soi ou i pans la katastrof v’arivé é konm tout demoun résponsab ou i sèye fé sak lo posib pou anbar l’afèr. Soi ou i kroi pa é l’èrla, ou i fèrm in pé out také, sar bon pou out santé. Aprésa, si sa i ménas sèryèzman néna résponsab in n’afèr konmsa é l’opinyon internasyonal i doi okip z’ot ka bien konm i fo.
Astèr matant, rouv in télé, rouv in radyo é ou va oir bann ménas i pèz dsi nou lé bien réèl é lé pa invanté ditou.. Kèl tan pèrdu par la fote bann négasyonis lo réshofman klimatik. Espéron sé in tan k’i pé ratrapé ! Espéron pars sansa sra pa doss ditou. Tok ! Pran sa pou ou !