Dépi in bon koup de tan, lé shoz i klosh pa pou la France, la ba dann l’Afrik. Kot d’Ivoir li, Nizèr li, Tinizi li. Partou-la la France i bour son né, mé san an avoir in bon rézilta. I diré li la konm anvi artourn la ba par la fénète, vik fitintan, li la sort par la port. Té pli fasil dik son loi kan ou lavé lo pouvoir, par ou mèm, shé lé z’ot, sansa kan ou l’avé mète o pouvoir in gouvèrnmann manekin. Mé lé shoz la bien shanjé. Bann pèp i oz mèm révolté, é kan zot i revolt, lé pa fasil aplik azot in loi zot i vé pi. Solman kan i san l’ay, i diré gouvèrmnan fransé lo né lé boushé.
Figuir azot, mardi la somèn passé, madam la minis z’Afèr étranzèr i déklar gouvèrnman la France lé paré pou done in kou d’min prézidan la Tinizi... anvoy son bann zandarm la ba pou ède la polis. Baba ! Rozman pou li, lo prézidan la défil an zourite avan, pars si l’avé di oui, kèl trikmardaz mon dyé ségnèr, kèl KO mon dyé siouplé !

 Justin