Mi pans zot i doi suiv-suiv in pé lo pré-kanpagn pou lo réjyonal. Zot i koné ké dopi in sèrtin koup de tan, sé lo trin k’ lé an védète. Kisoi lo pti gigine trin Didier Robert osinonsa sète bann sosyalis, kisoi lo TER Thierry Robert. Kisoi lo trin in raye mod Park disney touzour vèrsyon Didier. I mank pi ké Vèrgoz i arsort dann son kartron so léspès trin Anfibi li l’avé invant dann l’ané 2010 : in trin k’i roul dsi lo blaké, ki roul dsi lo raye. Mi koné pa si li roul dsi d’lo mé lé for posib.

Si, konm di lo kont, lo ridikil té i tyé, in bonpé nora fine gingn l’apopléksi si la pa lo koma sirkilatoir. Pars la késtyon lé sèryé é i mérite in sèryé réfléksyon. Vi la kantité loto é la kantité kamyon, vi ké La Rényon la pa konm i di grandisab, mèm li pé z’ète rétrésisab avèk la goumantasyon lo nivo la mèr. L’èr-la, la pa loto va sov anou, mèm pa lo kar. Kosa i pé sov anou alor ?
Sak i pé sov anou sé konm di lo kont in miks avèk in pé tout moiyinn transpor. Loto tousèl li gingn pa, lo kar tousèl li gingn pa non pli, vélo tousèl nou lé mal baré, lo trin tousèl li osi lé pa sak i fo. Sak lé sir sé ké, konm ni koné nout péi lé déviré lo trin lé nésésèr, konm la bézoin loto, lo bis, kamiyon, konm la bézoin téléférik.

Mé, konm moin la fine ékri nana lo prozé tram-trin. Sa lé fine fé, lé fiselé, i atan arienk pou ète réalizé. Si na pou modifyé, modifyé, si na pou pous ali pli loin, pous ali pli loin, mé anvoy ali san tardé. Bann z’invantèr la poud a kanon, la pa bézoin fatig z’ot koko !
La pa bézoin diskite a pèrt do vi. I ansèrv de koi tout so bann zéstikilasyon ? Moin, pou mon par, mi ékout tazantan é mi invit in pé pou ékouté l’éskètch Thierry Jardinot toulmoun i koné é avèk li mi anvoy pars sa i fé plézi amoin : « Kèl trin ! kèl trin ! Rap la vièy ! Rap ! »