Mi sorte lir dann noute zoinal , i paré laba an parmi bann dépité épi bann sénatèr dann parlman franssé banna l’apré diskite in loi i sava ziss dann sanss kontrèr lintéré zénéral – li vé artourn an aryèr par rapor la protékssion la natir.

Or, ni koné, la natir lé dann danzé par rapor son lékilib épi son bio-divèrssité. Noute toute i koné lo réshofman klimatik donk son dérègloman la pa inn krak mé in réalité. Toulézour dann laktyalité i anparl bann glassyé apré fonn,bann z’ice-berg a la dériv. I parl ossi bann pèryode kissoi la séssrèss, kissoi la kanikil, kissoi dofé dann foré i pète in pé partou.

La volonté zénéral sré kossa ? k’i aplike bann zakor d’Pari, k’i prézèrv la vézétassion, k’i roplante ban foré é ké la vi i dovien pli agréab pou toute demoune… Mé lé lwin d’ète lo ka.Dann déssèrtin provinss an franss i fé si tèlman sho k’ lékol i fèrm.

Alor wala lo pèryode shoizi par déssèrtin dépité épi sénatèr pou vote in loi an katimini pou dérèg ankor in pépliss lo klima é mèm si in santène zassossyasion i manifèste kont sa, wala bann dépité épi bann sénatèr-pa toute mé in bonpé kant mèm pou dévir lo do avèk lo vré lintéré zénéral.Antouléka sak lo moune normal i panss sé lintéré zénéral.

A bon antandèr salu !