Médame, zé Méssyé, la sossyété, koze èk mwin sé koze èk in kouyon, mé sé o pyé d’ lo mir ki oi lo bon masson.

Mézami, na poin lontan moin la anparl azot « patoi » é mèm moin la di azot, mi yèm pa i apèl nout lang kréol rényonèz in patoi. Pars in patoi pou nou-dann noute tradissyon kréol – sé in léksprésyon konmsa pou fé ri, pou annargué, sansa pou donn in kou d’aré, pou amontr ou l étoné sansa pou mark d’ot kalité léta ou lé d’dan..

Patoi moin la mark an-o la, mwin la konète ali kan mwin l’avé par-la dizan é dann tan-la trépé d’moun l’avé la montr pars mi rapèl pi bien mé sirman sa lété shèr. Koméla lé possib si ou done in marmaye in montr ou i malkontante ali pars sak li yèm sé téléfone i indik in pé toute zafèr.

Par l’fète sa i fé panss amwin in provèrb té ki di konmsa : « Toute blan néna la montr, mé zot la pwin lo tan. »... in kassaz lé kui pou di souvan défoi bann blan - bann patron si zot i vé - i zoué lo moune okipé vèye pa koman, kaziman sirbouké. Soman li na l’tan pou son sipèryèr pars avèk sa i grate pa l’korpyon. Alé ! Mi kite azot rofléshi la dsi é ni artrouv pli d’van. Sipétadyé.