Na poin lontan moin la anparl azot « patoi » é mèm moin la di azot, mi yèm pa i apèl nout lang kréol rényonèz in patoi. Pars in patoi sé in léksprésyon konmsa pou fé ri, sansa pou donn in kou d’aré, pou amontr ou l étoné sansa pou mark ‘ot kalité léta ou lé d’dan... Patoi moin la mark an-o la, moin la konète ali kan moin l’avé par-la dizan é dann tan-la trépé d’moun l’avé in montr pars mi rapèl pi bien mé sirman sa lété shèr sa. Koméla lé posib si ou done in marmaye in montr ou i malkontant ali pars sak li yèm sé téléfone i indik in pé tout. Par l’fète sa i fé pans amoin in provèrb té ki di konmsa : « Tout blan néna la montr, mé tout la poin l’ tan. »... in kasaz lé kui pou di souvan défoi bann blan-bann patron si zot i vé-i zoué lo moun lé okipé vèye pa koman, kaziman sirbouké. Soman li na l’tan pou son sipèryèr pars avèk sa i grate pa l’korpyon. Alé ! mi kite azot rofléshi la dsi é ni artrouv pli d’van. Sipétadyé.