Matante Zélida la ékrir :
Mon Shèr nové, kossa moin l’avé di aou ? Pti bonom-la, sak i gouvèrn la Frans-la, i travay po nou sa.
La, tout bann vié moun i sava gingn in prime dé san éro. Oui, mon nové ! La pa dé pti katsou, mé kaziman in gro moné.
Kan mi pans sa, mi kalkil aou, avèk out ti-port-moné platemèm. I fé pitié oui, mé vi mérite in pé ! Vou avèk toussa mové z’idé néna dann out tète.

Justin la réponn aèl :
Mon pov vié matante : diré k’ou i pran po d’shanm pou pla kouvèr, makaroni pou la bouzi. Sa lo désan éro-la, sa la pa antomatik pou tout vié moun sa. Nana dé kondission pou an avoir sa. Akout zournal ou va oir si moin la poin rézon : i fo an avoir lo fonn’solidarité épi gingn moin ké 628 éro. Alor, kri pa tro for, sote pa anlèr tro bonèr. Tir pa sosis kui dann vant koshon !
Riskab la pa pou ou ! Pran touzour in pé tizane matrékèr : sa sar bon pou ou fransh vérité !

Justin