Kan in n’afèr i fonktione pa bien, alor i fo shanjé. Kan in nafèr lé tro shèr, i fo rod in manyèr pou diminyé lo pri, sré t’i konprann pou kosa lé shèr konmsa. Mé kan in nafèr i marsh bien, i kout pa tro shèr, kossa i fé ? I shanj kan mèm : sé loi bann gro vaza.

Agard in pé la késtionn kouran. A partir d’zordi, zot lé lib adrès azot kisa zot i vé pou ashté zot kouran léktrik, zot limyèr. Par égzanp, sa in sinp sipozision, si zot i vé ashté zot kouran avèk Justin, zot i pé. Solman domaz, Justin na poin kouran pou vann. Sa in tik-tak i apèl la libèrté, sa i apèl la konkirans, la konkirans non "faussée" siouplé. Zot i souvien, la rod fé anval anou la konstitision éropéenne pou sa. Donkalor, nou la anvoy dingué. Zordi, i fé anval anou, bout par bout, sak nou la ranvoyé.

Késtionn kouran, la fine fé konmsa dann d’ot péi, mé tout i koné kouran la vni pli shèr épi koméla, nana plis pane !
Bin alor, akoz i fé sa ? Pou la gloir lidéolozi libéral, épi konmsa, déssèrtin vaza va gingn plis larzan, parashit doré, lavyon privé, kroizyèr malèr. Kisa la di la vi lé mol ? Pandan stan-la, kabri i manz salad ! Ti-kolon, la posh lé plat ! La bank i guèt azot travèr !

Justin