Si i rouv radio zordi, moin lé pliské sir va antann koz déssi manzé. Kisa la manz kosa, koman la fé kui sa, étsétéra, étsétéra, la ké lo ra. Pé sfèr in pé dmoun lé riskab ète shoké, akoz lé vré nana dmoun lé privé, isi mèm, épi dann bann péi i antour anou. Bien sir, lé kom sa : kosa ni pé fèr ? In gout dolo i ranpli pa la mèr.

Moin, mon pansé, sé pou bann vié moun la transmète anou zot manièr fé kui manzé zénérasion an zénérasion. D’in sèrtin fason, ni pé dir zot ossi sé zarboutan nout kiltir, akoz la kuizine, sa in piès kapital dann la kiltir in pèp. Sa in nafèr i fo pa lès pèrd, épi fé la pass bann zénérasion k’i vien : zanfan, pti zanfan, arièr, arièr-arièr. Oubli pa non pli amontr sa dann lékol ousa i aprann kui manzé.

Antansion, mi kritik pa bann kuizinié, dizon bann zartis i travay tout sak i fé manzé ansanm pou fé in manzé nouvo, sansa in manzé diféran. Demoun konmsa, i fo ossi. Solman, i fo rokonète la pa toulmoun i gingn abitié nouvo kalité lo gou, lodèr, mèm la prézantasion. Alor, dé foi, i di lé bien bon, par onèkté.

Dizon sé in késtionn’gou. Manz-boir sak zot i vé, sak zot i pé ; provi k’lo manzé-boir i ral azot.

Justin