Matante Zélida la ékri :
Mon shèr nové, mi aport aou in nouvèl, moin lé sir i sar pa fé plézir aou. Biensir, malfondé konm ou i lé, ou lé riskab trouv in n’afèr pou mète la-dsi : sof koué k’ou va dir, mi koné sa va tourn out bil kant mèm. Alor, moin lé kontan d’avans ! Ala lo zafèr : shomaj la béssé, mon nové, dopi k’lo pti bononm lé a la bar. I rèst arienk 7,5% d’shomèr, épi lané 2007, la fé 300.000 plas travay an plis, épi néna 320.000 pèrsone la mète z’ot lantrepriz anlèr... Alé boir in pti pé d’lo, va rofé aou.

Justin la réponn :
Mon vié matante, m’a di aou in nafèr, mon léspès vié péshrès, out nouvèl nora fé plézir amoin si lété vré pou vréman. Mé kan mi agard bann shif, mi oi nana ankor 2,1 million d’moun lé shomèr, épi nana ankor 2,7 million dmoun i èmré travay, épi la poin boulo - dizon, shomèr pou vréman ! Azout ankor èk sa tout sak i èmré travay pliss akoz zot na poin in somène travay normal. Épi, bon pé dmoun la pran z’ot rotrète avan z’ot tan si tèlman zot la pèrde konfians. Alor, mon vié matante, éskiz mon pardon, mé dsi la késtion travay, lé mol mèm, lé touzour mol. Na artrouvé !

Justin