Koz èk mwin sé koz èk in kouyon, mé sé o pyé d’lo mir k’i oi lo masson .Mézami, mi panse zot i koné konm mwin kozman mwin la mark an-o la. La pa in provèrb konm sak mi mète dabitid avèk in sans prop, in sans figuiré, inn moral é in linvitasyon pou bien rofléshi dsi.

Sak mwin la mark zordi sré plito sak in pé i apèl in gro léspri kréol : i détourn lo sans in késtyon pou réponn par in plézantri. Mi sava pa ésplik azot sa, pars si zot lé kréol konm mwin zot i koné bien pratik gro léspri .Mi panse mèm zot ossi konm mwin zot la fine pratik sa é bien souvan dé foi.

Dann nout abitid kozé an rényoné, ni apèl sa in « patoi » : in sort lésprésyon pass partou é sak i di sa, i fo pa kroir li rofiz réponn in késtyon dsi koman li lé , mé l détourn la késtyon pou fé sourir son lintèrlokitèr. Alé ! Mi kite azot pou zordi é ni artrouv pli d’van. Sipétadyé.

NB : Mwin lé sir koméla i di pi sa ,sansa tazantan rarman, épi rant moun néna déza in bon laz, mé la pa interdi tir in kozman dann frigo pou armète ali an sirkilasyon...