Poitan dopi noute listoir la komanssé la komanss plante do ri é bande voiyajèr i rakonte koman dan la Plène Sin-Pol l’avé bande karo d’ri. Pa pou done manzé bande zésklav pars zot téi doi kontante azot avèk bande kassav é souvan dé foi bande galète manyok mov é kalité.

Antouléka pou bande blan téi plante do ri ziska k’in zour la désside fé linportassion d’ri é obliye la plantassion do ri dann noute péi. Aprésa suivan la pèryode la plante do ri pa an grande kantité, mé an pti kantité. Alor kan l’avé in guère nou té bien annuiyé pou ranpli noute bouzaron. Fé koze bande zansien, mi jure zot néna dé shozze a dir !

Mi rapèl in zour in kamarade Boi d’nèf – son pti nom lété Toto, Toto Nirlo – apré triye son ri épi téi larg bande grin anbalé dann zot paye atèr é landroi li téi triye son ri, l’avé touzour in pti kouran d’lo. Si tèlman la poussé, la grandi épi la done zépi. Li téi doi même amenn sa Témoignages mé konm mwin la kite La Rényon in pé d’tan, mi koné pa si son bouké zépi l’ariv biro nout zoinal dann la ru Maréchal Leclerc. Mi panss l’arivé mé na pi pèrsone pou rakonté.

An touléka mi koné koté d’Sin-Pyère la plante do ri la même roganize in filière, mé bande zinportatère, la bèss lo pri d’ri é in pé la larg lo kor. Néna dé-troi somenn mwin la vi dann télé té apré fé in rékolt de ri, in gayar kalité ma foi. Astère bande militan la kiltire do ri l’apré goumante pézapé la grandère zot karo d’ri kissoi laba sinte – anne, kisoi dan lé o Sin-Pol, kissoi d’ote landroi ankor.

An touléka, ni koné issi i pé plan te de ri, é la tère La Rényon lé pa diskalifyé pou sa. Alor kossa i fé ? Mi pans i fo plante do ri-la é bande kominis kissoi militan, kissoi sinpatizan, i doi rante dan la danss. Si noute parti i di k’i fo fé sa, alon fé ! Nou v’arivé mo bande dalon !

La Rényon noute péi – PCR noute parti.

Justin