Dimansh, moin lété an parmi – inn shans konm zot i konpran. L’avé in pé d’moun tout kalité, tout laz mi anshèv dir. L’avé galman bann ti marmaye. Tousa té apré koz foutbal : ki ki pèrd, ki ki gingn, Gasarin-Briné, Gasparin-Briné. Moin la romark in pti marmaye li koné lo nom bann zouar, lo nom bann lékip, mèm lo shimagré bann moun la mark lo bi i fé. Li koné galman kisa la mark lo bi. Lé normal zot va dir amoin : kan ou lé jenn ou néna bone tète, kan ou i viéyi ou i pèrd la mémoir épa arienk sa.

Donk pti marmaye-la, konm k’i diré néna répons – a-tout. Sof in n’afèr : kan li lété fine asonm anou épi sirtou moin avèk tout sak moin la mark an-o la, li la poz amoin in késtyon mé in késtyon sèryé. Li la dmann amoin, pou kosa La Rényon i zoué pa la koup di mond. Konm l’avé an oparmi inn-dé tète piosh, moin la pa réponn ali konm moin noré pi fèr. Moin la di ali sinploman : « Sa in gran késtyon li poz ! ». Apré nou l’arète la pou pa déklansh bann diskisyon.

Pou pa déklanshé ? Kroi azot. Pars lo pti marmaye, dé k’la tourn lo do pou li alé donn kou d’pyé dann balon. Diskisyon la komansé. Na inn la di : « Kan marmaye i poz in késtyon, i fo réponn ! Si ou i réponn pa sé k’ou i koné pa arien par raport lédikasyon zanfan » (In syans inégzak konm zot i koné). In n’ot la di téi suifi réponn, nou lé fransé donk lékip de Frans sé galman nout lékip. In n’ot la di néna pti péi néna z’ot prop lékip, akoz nou na poin la n(ot ? Lo ton la monté mi di azot. Bataye kouto foishète la shanj an bataye la lang. Bataye kozman. Priz de gèl ! Lo nom zoizo la komans volé.

Dann in lanbyans konmsa lo modératèr si li égzis, toulmoun i tonm dsi li. Toutsuit moin la konpri lo foutbal té i kashyète in bonpé d’ot késtyon. E kan ou i koné bann késtyon-la, i vo myé ou i mète pa out doi rant lo zarb épi l’ékors pars ou lé pri é bien pri. Si ou i koné lo frui lé pa mir, pa bézoin alé kasé. Si ou i koné na poin répons pou out késtyon atann avan poz ali. Késtyon ? Répons ! Késtyon ? San répons ! Tardra viendra.