Pou kossa lotosifizans alimantère ? Mi pans néna bonpé rézon. Dabor inn sa lé possib issi La Rényon. Dézyèmman : pars sa lé bon pou nou rényoné konm pou toute bannzil loséan indien. Pars nou rényoné ni souète ke sa. Arzoute ankor in n’afèr : kan nou lé anmanke késtyon linportassion, i fo ni fé par nou-même. An pliské sa, ni koné noute bande produi é la kalité noute bande prodiktère é sak i fé ayèr i ral pa nou vréman...

In poin inportan : la surprodikssyon : i fo ni produi plis ké ni konsome, kissoi pou lésportassion, kissoi ankor pou ramassé an ka k’i manke pou l’ané ki vien, sansa pou bande zané k’i vien. Donk nou la bézoin bande travayère é sa i tonb bien dann in péi néna bonpé shomaze.

Ni pé ankor dire sa lé possib zordi kan ni koné toute la sirfass la tère lé an frish. Arzoute èk sa bande zardin partazé, lagrikiltir an vil, l’agrikiltir an otèr osinonsa sinploman dsi bande toi limèb… toussala apiyé par in gran léfor dann la roshèrch é la roshèrch a lé bon pou lo randman, pou la kalité é pi la kantité, san konté la prézèrvasion bande varyété frui, léguime épi la biodivèrsité

Donk si sa lé possib, si ni yème sa, si sa lé bon pou l’anploi épi in ta zafère mwin la fine marke dopi talèr-la, la solission pou bande militan épi sinpatizan noute parti, rante dann ron shake foi ké ni oi sa lé bon pou fé avanss lo poinnvizé noute parti. Zot va dire amwin an koué sa i konsèrne lo parti, ébin lé sinpe : lo parti i lite pou lotosifizanss alimantère é pouss dan son sans sé pouss dann sans lintéré noute péi épi son popilassion.

La Rényon noute péi, PCR noute parti.

Justin