Na dé-troi soir Paul Vergès la pass dann télé dsi Rényon promyèr. Mi sava pa fé, konm di lo kont, in kont randi. Mi sava solman rakont in kékshoz l’arivé ké moin la trouv komik épi tris an mèm tan. Ala l’afèr :

Momandoné, dann lo l’émisyon, sé lo l’intèrviouvé k’i poz késtyon. Kèl késtyon li poz lo dé pèrsone. D’aprézot, konbienn moun i viv Madégaskar ? Emmanuelle Haggai, in gran résponsab dann la rédaksion Rényon promyèr, i komans par di èl pèrsonèl, èl i prann ar pal o risk pou réponn lo késtyon. Mésyé Montrouge rédaktèr an shèf lo JIR, pou son par, li pran lo risk épi li di kat sink milyon d’moun par la.

Paul i romark li l’avé rézon poz lo késtyon épi li di koméla nana 24 milyon malgash. L’ané 1947 l’avé kat-sink milyon, é an 2050 nora 55milyon : in jéan a koté d’nou in p’ti nin… La pa tousa, moin mi kalkil si l’avé poz késtyon dsi lo nonm fransé dan La Frans banna noré koni par kèr. Si l’avé d’mann konbienn d’moun i viv dann Paris, lo intra-miros é lo éstra-miros bann zournalis nora koni san molir…

Alor, pou kosa zot i koné pa konbienn moun i viv Madégaskar ? Pars, sanm pou moin, pou zot Madégaskar é zéro lé parèy ; la pa domin la vèy li va kont pou kékshoz dann l’éspri banna.… Poitan l’èr i vien péi-la, sar in gran péi. Konm k’i diré in nouvo dragon l’oséan indien é nou ? Késtyon mi lès san répons pou zordi.