Mi rode kékshoz pou anpèsh amoin anparl lo lémissyon « douz kou d’midi ». Pou kosa ? Pars dopi inndé zour in bonpé d’moun i anparl de sa épi i di lo lémissyon la baskil dann rasis. Mi pans moin la trouvé : figuir azot bann gran pédagogoz kan moin lété pti téi rode, i rode mèm in manyèr pou anpèsh bann marmaye kont avèk zot doi é biensir lo sor i tonm dsi lo zélèv Toto. Toto i gingn pa anpèsh ali kont dsi son doi.i di ali : « troi plis troi » li kont dsi son doi, i di ali mète son min déyèr son do épi di konbien i fé kat épi kat, li kont ankor dsi son doi… Final de kont lo gran pédagogoz i vien dann son tète in tro bon lidé. Li di Toto mète son min dann son posh épi di konbien i fé sink plis sink. Toto i pran lo tan mèm konmsi li kont ankor épi di si, i fé onz… A bon ! Donk sé sa lo onzyèm doi alor !