Mé zami, zordi mi sava koz avèk zot dosi in n’afèr mi èmré bien zot i rofléshi épi si posib zot i sèye konm moin, fé avans lo schmilblik –konm défin Colucci té i di.Alor kosa i lé zafèr mi vé anparl azot.Ala li la :

Mésyé, médam, la sosyété, zot konm moin-an touléka , sé sak mi kroi- shak zour k’i pass ni fé travaye nout koko ds iin problèm sèryé, lo dévlopman nout péi. Shak zour k’i pass ni trouv dé shoz pou nou sa i doi amenn nout péi dann shomin lo dévlopman é anplis in dévlopman prop, pa dépansyé épi bon pou nout tout, pou nout santé, pou nout lanvironeman, pou konsèrv nout tèr an bon n’éta.

.Nout léspri lé konm kaptivé par sa-dizon konm papiyon dovan in lanpoul éléktrik alimé- é kan ni sava dann in péi étranj, ni domann anou dsi lo poinnvizé nout dévlopman pou kosa nou lé an rotar par raport in bon pé péi.Pou kosa nou la zap la révolisyon indistriyèl, la révolisyon télknolozik é pou kosa lo proshin révolisyon ékonomik l ériskab arivé épi pass dsou nout né- mi vé anparl lo dévlopman dirab.

Pétète vu sak mi di, in pé i konpran pa tro bien ousa mi vé alé ! Pétète inn-dé légzanp va rann mon kozman pli klèr an toukélka mi pé éséyé :

- Fitintan, moin la ékrir in sinkantène zartik pou Témoignages . Dann lo bann zartik la, moin la sèye asplik kann sé nout jar l’or vi lo kantité produi dérivé i pé fé avèk li.Mon bann kozman té titré konmsa : « La canne ,c’est le sucre mais pa seulement »-« Kann sé dsik é pliské sa ». Pèrsone la pa sote désu é mi pans mèm in pé la pran amoin pou in moun la tète in pé déranjé.Pé sfèr zot la rézon mé konm di lo kont :déranjé ?Pou aranjé.

- in tan in kamarad mi réspèkt pou tout lidé li néna lété apré asplik tout sak i pé fèr avèk koko-sa i intérèss nout bann zami shagosien sa é bonpé d’moun téi ékout ali zyé ron é kan li la di sa, moin la poz in késtyon.Moin la di ali si i pé fé sa, akoz i fé pa sa La Rényon mèm ?Moi n la gingn in répons ké la pa in répons pars sak la di sé ké isi i gingn pa fé sa ? Pou kosa ? mi koné pa bien avèk présizyon...Ala pou kosa mi di i soré bon ni rode in répons bien prési dsi sak lé posib é sak lé pa , késtyonn fé avans in pé nout rézoneman. Ni artrouv !

Justin