Mi mazine, konm moin zot la fine romark in n’afèr dan la piblisité. Kan ou i apèrsoi, pou out port-moné, marshandiz lé tro shèr, ou i évite alé tro souvan la boutik par pèr i plime aou in pé tro é i mète out kont dann rouz. Nana mèm inn-dé magazin, toulézour zot i fé promosyon dési in marshandiz diféran, konmsa demoun lé foulé dan zot magazin é i ashète pa arienk lo famé marshandiz an promosyon. Sa i apèl in produi pou fé zapèl : ou i koné lo ti-tak, mé sa i anpèsh pa ou tonm dann zot pano.

Gouvèrnman la France i fé parèy avèk nou. Li komans par bour nout krane avèk son bann z’idé. Li di anou, i fo lo péi i fé zékonomi pou diminyé la dète. Pars ki di dète i di osi z’intéré avèk kapital pou ranboursé. Oplis ou nana dète, oplis i fo ou i pèy, é sak ou i pèy i sèrv tré pé lo péi, vi k’larzan i sava dan la posh bann prétèr larzan. Sa lé bien vré ! Aprésa, li di, lo plan pou fé zékonomi sar ékitab, bien partazé rant toulmoun, é zot i matrak so l’idé-la é, biensir, bann médya i bate tanbour la-dsi.

Konm de moun i kroi pa tro, i di ankor bann gro rishar i sava péyé. Pti kolon lé kontan, pars na lontan zot i vé k’i tir larzan dan la posh sak nana, pa dan la posh sak na poin. Lotrozour, mésyé Fillon l’apré fé in konférans. In zournalis i domann ali konbien bann gro vaza va péyé. Li réponn pa dirèktoman, li di lo boug lé marké dési lo papyé i sava done ali. Li vé pa gate la sos son plan, mé li fini par dir banna va pèy par-la dé-san milyon.

Dé-san milyon ! Arienk sa mèm ! Lé zot va pèy plis onz milyon, é in bonpé va sort dan la posh bann ti-kolon, bann jènn, bann vyé pèrsone, é bann klass moiyène. Lé ékitab in ! Lé bien réparti ! Kroiyé moi é fouté vou d’dan. In bon légzanp produi zapèl, in bon manyèr fé pass in mové pilil.

NB : Kozman kréol : moun vilin nana ankor, moun kouyon, sa lé plizanpli rar.

Justin