Konm moin la fine ékri, gouvèrnman la déside fé in nouvo réform définitiv nout sistèm rotrète. Dèrnyé réform définitiv la fé lané 2003… é sé méssyé Fillon la fé sa. Dizon, in vré éspésyalis déssi la késtyon, in éspésyalis dann toute lé éspésyalté... Lé forsé, li di li-mèm, vi k’lo bato i sava koulé. Alors, li la déside tir dan la posh toulmoun, mèm dann sète nana in bon pourkoi pli k’i n’anfo. Sé konmsa, la di, bann moun i toush plis onz mil éro dann in moi, i fo zot i pèy in pé. A foutor va ! Kissa la di gouvèrnman i fé pa pèy bann rish ? Sakré mizèr in sor, sa sé d’la mantri pou vréman !
Oté ! I rosanm l’èr i sort shanjé. Sé pa si na poin in nouvoté ? Touléka, mi sorte lir dann zournal la Frans, gouvèrnman i vé propoz demoun i pran zot rotrète soisann-dé, ou sinonsa soisann-troi zan, va goumante kotizasyon bann fonksyonèr… épi ? Épi pi riyin ! Pi d’kotizasyon an plis déssi bann i apèrsoi in bon moné. A bon ? Oui, i sanm sé pou rézon, k’i di banna i vote plis pou la Droite, é kan zéléksyon i vyin, la pa bon fé in n’afèr konmsa, la pa bon koup la bransh ou lé assiz déssi.
Poitan, méssyé Fillon l’avé roprosh la Gauche son mank kouraj pou fé in vré réform, li l’avé di, avèk li na poinn kikilik, na poinn ézitasyon, na poinn domi-mézir. Pou li, sé l’intéré la Frans konm fil rouj. I diré nana konm in mank kouraj la ? Konm di lo konte : « Courage, fuyons ! ». Kouraj, alon baré !

 Justin