Mi pouré ajoute ankor in n’afèr sé ké la pa toulmoune i pass parèye dann sak mi pé apèl in ladministrassion kolonyal-éskiz mon léspréssion mé lé normal mi koz konmsa pars mi apartien in zénérassion la bien konète sak i apèl la répréssion. Mi dira pa pliss mé si in zour lokazyon i prézante nou va oir.

Astèr si ni anparl la résponsabilité lé z’inn épi lé zot, ni pé dir dann in koléktif, néna konm i di bèf dovan épi bèf déyèr, inn i ral vréman sharète l’ote i manz fouraz an atandan k’i domann ali pou ral sharète son tour. Mé si i domann pa li, li bouz pa tro, li aspèr fér obliye ali é défoi sa i marsh.

Si tèlman ké samdi, dann in rényon néna inn kamarade la di, afors toute téi di i fo fé si, i fo fé la, i f o pa obliye sossi é pa obliye sola, el la avanss son règ di zé é èl la di : la formul pou el sé lo KFK- troi lète mé in partaz résponssanbilité a tou lé kou.

KFK ? Pou mwin mi konpran Ki fé koi, osinonsa Kissa i fé Kossa pars si néna bonpé zafèr pou fèr é si ni vé k’léshoz lé fète nou la bézoin in partaz résponsabilité. Toute zidé i pé ète bon, mé kissa i okipe.Pars si pèrsonne i okip pa, forséman kékpar in n’afèr va foiré é pandann tan-la kabri i manz salade... Dizon lo zour la koz de sa, aparaman l’avé plizyèr bone volonté.

Lo myé sé ké bann volonté i dir ? Pars si li fiz i sava pa bien loin.
A bon antandèr,salu !