Médam, méssyé, la sosyété,mézami, koz èk mwin sé koz èk in kouyon, mé sé o pyé d’lo mir k’i oi lo masson.Kozman mwin la mak an-o la, mi pans zot tout i koné-bann léktèr Témoignages i koné in bonpé zafèr ! Lé mèm possib mwin la fine anparl sa mé sa i fé arien... Pars néna touzour in sirkonstanss la vi i amenn a panss kozman-la. Sirtou sète mwin la mark an-o la, pars si mi tronp pa kozman-la i ankouraz in pé la koripsyon . Dayèr promyé foi mwin la antann sa lété dann la boush in moun lété réputé pou zoué volèr kissoi dann kart kissoi dann domino sansa d’ot zé. konm li téi zoué pa pou larzan,téi fé arien é son bann dalon dann tan-la ti anvé pa ré li té touzour la konm i di pou fé lo katriyèm. Mé kan sa i dovien in prinip pou la sosyérté sé la k’lé shoz la pi bon ditou. Konbien prossé mon dyé ségnèr, konbien d’moun kondané , mé konbien i shap lou maye. Pars néna in bonpé i pass par maye é la sosyété lé pa touzour bien armé pou lite kont sa.Alé ! mi kite azot rofléshi la dsi é ni artrouv pli d’van. Sipétadyé.

Nb Mézami, mi panss zot la fine konprann tout provèrb mi aparl la pa mwin la invanté é néna arienk lo pti komantèr i sort dann mon tète. Lo sèl invantèr bann kozman-la sé la kiltir popilèr, donk o pèp é mèm toutt bann pèp. ni artrouv, na arvi sansa nou va ékrir.